Après celle feste, mena
li roys
li comte de Poitiers à
Poitiers pour reprendre ses fiefs. Et quant
li roys vint à
Poitiers, il
vousist bien estre arières à
Paris; car il trouva que li
cuens de
la Marche, qui ot mangié à sa table le jour de la saint Jehan, ot assemblé tant de gent à armes à
Lusignan
delez
Poitiers comme il pot avoir. A
Poitiers fu
li roys près de quinzeinne, que
onques ne s'osa partir tant que il fu
acordez au
comte de la Marche, ne je ne sai comment. Plusours foiz, vi venir
le comte de la Marche parler au
roy à
Poitiers de
Lusignan; et touz jours amenoit avec li
la royne d'Angleterre sa femme, qui estoit mère au
roy d'Angleterre. Et disoient mout de gent que
li roys et li
cuens de
Poitiers avoient fait mauvaise paiz au
comte de la Marche.
Après ce que
li roys fu revenus de
Poitiers, ne tarda pas grantment après que
li roys d'Angleterre vint en Gascoingne pour guerroier
le roy de France.
Nostre sainz roys, à quanque il pot avoir de gent, chevaucha pour combattre à li. Là vint
li roys d'Angleterre et li
cuens de
la Marche, pour combatre devant un chastel que on appelle
Taillebourg, qui siet sur une male rivière que on appelle Carente, là où on ne puet passer que à un pont de pierre mout estroit. Si tost comme
li roys vint à
Taillebourg, et li
host virent li uns l'autre, nostre gent, qui avoient
le chastel devers eus, se esforcièrent à grant
meschief et passèrent perillousement par nefs et par pons, et coururent sur les Anglois; et commença li
poingnayz forz et grans. Quant
li roys vit ce, il se mist ou péril avec les autres; car pour un home que
li roys avoit quant il fu passéz devers les Anglois, li Anglois en avoient bien vingt. Toutevoiz avint il, si comme Dieu vout, que quant li Anglois virent
le roy passer, il se desconfirent et mistrent dedens
la cité de Saintes; et pluseur de nos gens entrèrent en
la cité mellé avec eus et furent pris. Cil de nostre gent qui furent pris à
Saintes recordèrent que il oïrent un grant descort naistre entre
le roy d'Angleterre et
le comte de la Marche; et disoit
li roys que li
cuens de
la Marche l'avoit envoié
querre, car il disoit que il trouveroit grant aide en France. Celi soir meismes,
li roys d'Angleterre mut de
Saintes et s'en ala en Gascoingne.