Or revenons à nostre matière, et disons ainsi que après ces choses tint
li roys une grant court à
Saumur en Anjou; et là fu je, et vous tesmoing que ce fu la mieux
arée que je veisse
onques. Car à la table
le roy mangeoit, emprès li, li
cuens de
Poitiers, que il avoit fait chevalier nouvel à une saint Jehan; et après
le comte de Poitiers, mangeoit li
cuens
Jehans de Dreux, que il avoit fait chevalier nouvel aussi; après
le comte de Dreux, mangeoit li
cuens de la
Marche; après
le comte de la Marche, li bons
cuens
Pierres de Bretaigne. Et devant la table
le roy, endroit
le comte de Dreux, mangeoit
mes sires li roys de Navarre, en
cote et en mantel de
samit, bien parez de courroie, de
fermail et de
chapel d'or; et je tranchoie devant li.
Devant
le roy, servoit dou mangier li
cuens d'
Artoiz ses freres; devant
le roy, tranchoit du coutel li bons
cuens
Jehans de Soissons. Pour la table dou
roy garder, estoit
mes sires Ymbers de Biaugeu, qui puis fu connestables de France, et
mes sires Engerrans de Couci et
mes sires Herchanbaus de Bourbon. Darière ces trois barons, avoit bien trente de leur chevaliers, en
cottes de drap de soie, pour eus garder, et darière ces chevaliers, avoit grant plenté de serjans, vestus des armes au
comte de Poitiers, battues sur
cendal.
Li roys avoit vestu une
cotte de
samit ynde, et seurcot et mantel de
samit vermeil fourré d'hermines, et un
chapel de coton en sa teste, qui mout mal li seoit pour ce que il estoit lors joennes hom.
Li roys tint cele feste es hales de
Saumur; et disoit l'on que
li grans roys Henris d'Angleterre les avoit faites pour ses grans festes tenir. Et les hales sont faites à la guise des cloistres de ces moinnes blans; mais je croi que de trop loing il n'en soit nuls si grans. Et vous dirai pourquoy il me le semble; car à la paroy dou cloistre où
li roys mangeoit, qui estoit environnez de chevaliers et de serjans qui tenoient grant espace, mangeoient encore à une table vingt que évesque que archevesque; et encore après les évesques et les archevesques, mangeoit encoste cele table
la royne Blanche, sa mère, au
chief dou cloistre, de celle par là où
li roys ne mangeoit pas.
Et si servoit à
la royne li
cuens de
Bouloingne, qui puis fu roys de Portingal, et li bons
cuens
Hues de Saint-Pol, et uns Alemans de l'aage de dix-huit ans, que on disoit que il avoit esté fiz
sainte Helisabeth de Thuringe; que l'on disoit que
la royne Blanche le besoit au front par devocion, pour ce que elle entendoit que
sa mère l'i avoit maintes foiz besié.
Au
chief dou cloistre, d'autre part, estoient les cuisines, les bouteilleries, les paneteries et les despenses; de celi
chief servoit l'on devant
le roy et devant
la royne de chair, de vin et de pain. Et en toutes les autres eles et au
prael d'en milieu, mangeoient de chevaliers si grant foisons que je ne soy les nombrer. Et distrent mout de gens que il n'avoient
onques veu autant de seurcoz ni d'autres
garnemens de drap d'or et de soie à une feste, comme il ot là; et dist on que il y ot bien trois mille chevaliers.