Pour ce que vous sachiez dont cist fié que
li sires de Champaigne vendi au
roy vindrent, vous faiz-je savoir que li grans
cuens
Tybaus, qui gist à
Laingny, ot trois fiz: li premiers ot non
Henri, li secont ot non
Tybaut, li tiers ot non
Estienne.
Cis Henris desus diz fu
cuens de Champaingne et de Brie, et fu appelez li
cuens
Henris li Larges; et dut bien ainsi estre appelez, car il fu larges à Dieu et au
siecle: larges à Dieu, comme il appiert à l'esglise Saint-Estienne de
Troyes et aus autres belles esglises que il fonda en Champaingne; larges au
siecle, si comme il apparut ou fait de
Ertaut de Nongent, et en mout d'autres lieus que je vous conteroie bien, se je ne doutoie à empeeschier ma matiere.
Ertaus de Nogent fu li bourgeois dou monde que
li cuens créoit plus; et fu si riches que il fist le chastel de
Nogent-l'Ertaut de ses deniers. Or avint chose que li
cuens
Henris descendi de ses sales de
Troies pour aler oïr messe à Saint-Estienne, le jour d'une Penthecouste. Aus piez des degrez vint au devant de li uns povres chevaliers, qui s'agenoilla devant li, et li dist ainsi:
«Sire, je vous pri pour Dieu que vous me donnés dou vostre, par quoy je puisse marier mes dous filles, que vous véez ci.»
Ertaus, qui aloit darieriere li, dist au povre chevalier:
«Sire chevaliers, vous ne faites pas que courtois de demander à
monsignour; car il a tant donné que il n'a mais que donner.»
Li larges
cuens se tourna devers
Ertaut, et dist:
«Sire vilains, vous ne dites mie
voir, de ce que vous dites que je n'ai mais que donner; si, ai vous-meismes. — Et tenez, sire chevaliers, car je le vous doing, et si le vous garantirairai.» Li chevaliers ne fu pas esbahiz,
ainçois li prist par la
chape, et li dist que il ne le lairoit jusques à tant que il averoit
finé à li. Et avant que il li eschapast, ot
Ertaus
finé à li cinq cens livres.
Li secons freres
le comte Henri ot non
Tybaus, et fu
cuens de
Blois; li tiers freres ot non
Estienne, et fu
cuens de
Sancerre. Et cist dui frere tindrent dou
conte Henri touz lour heritaiges et pour dous contees et lour apartenances; et les tindrent après des
hoirs
le conte Henri qui tindrent Champaingne, jusques alors que
li roys Tybaus les vendi au
roy de France, aussi comme il est devant dit.