Dieus, en qui il mist sa fiance, le gardoit touz jours dès s'enfance jusques à la fin; et especialment en s'enfance le garda là où il fu bien
mestier, si comme vous orrez ci-après. Comme à l'ame de li, le garda Dieus par les bons enseignemens de
sa mère, qui l'enseigna à Dieu croire et à amer, et li atraist entour li toutes genz de religion. Et li faisoit, si enfans comme il estoit, toutes ses heures et les sermons faire et oïr aus festes. Il recordoit que
sa mère li avoit fait
aucune foiz à entendre que elle ameroit mieus que il fu mors, que ce que il feist un péchié mortel.
Bien li fu
mestier que il est en sa joenesce l'aide de Dieu; car
sa mère, qui estoit venue de Espaigne, n'avoit ne parens, ne amis en tout le royaume de France. Et pour ce que li baron de France virent
le roy enfant et
la royne, sa mère, femme estrange, firent il du
comte de Bouloigne, qui estoit oncles
le roy, lour
chievetain, et le tenoient aussi comme pour signeur. Après ce que
li roys fu coronez, il en y ot des barons qui requistrent à
la royne granz terres que elle lour donnast; et pour ce que elle n'en vout riens faire, si s'assemblèrent tuit li baron à
Corbeil.
Et me conta
li sainz roys que il ne
sa mère, qui estoient à
Montleheri, ne osèrent revenir à
Paris jusques à tant que cil de
Paris les vindrent
querre à armes. Et me conta que dès
Montlehery, estoit li chemins pleins de gens à armes et sanz armes jusques à
Paris, et que tuit crioient à Nostre Signeur que il li donnast bone vie et longue, et le deffendist et gardast de ses ennemis. Et Dieus si fist, comme vous orrez ci-après.
A ce parlement que li baron firent à
Corbeil, si comme l'on dist, establirent li baron qui là furent que li bons chevaliers li
cuens
Pierre de Bretaigne se
reveleroit contre
le roy; et
acordèrent encore que lour cors iroient au mandement que
li roys feroit contre
le comte, et chascuns n'averoit avec li que deus chevaliers. Et ce firent ils pour veoir se li
cuens de
Bretaigne pourroit
fouler
la royne, qui estrange femme estoit, si comme vous avez oy; et mout de gens dient que
li cuens eust
foulé
la royne et
le roy, se Dieus n'eust aidié au
roy à cel besoing, qui
onques ne li failli. L'aide que Dieus li fist fu tele que li
cuens
Tybaus de Champaigne, qui puis fu roys de Navarre, vint servir
le roy atout trois cens chevaliers; et par l'aide que
li cuens fist au
roy, convint venir
le comte de Bretaigne à la
merci
le roy; dont il lessa au
roy, par paix faisant, la comté de Anjou, si comme l'on dist, et la comté dou Perche.