En nom de Dieu le tout-puissant, avons ci arière escriptes partie de bones paroles et de bons enseignemens
nostre saint roy Looys, pour que cil qui les orront les truissent les unes après les autres, par quoi il en puissent mieus faire leur profit que ce que elles fussent escriptes entre ses faiz. Et ci après commencerons de ses faiz, en nom de Dieu et en nom de li.
Aussi comme je le oy dire, il fu nez le jour saint Marc evangeliste après Pasques. Cil jour porte l'on croix en processions en mout de lieus, et en France les appelle l'on les croiz noires: dont ce fu aussi comme une prophecie de la grant foison de gens qui moururent en ses deux croisemens, c'est à savoir en celi de Egypte, et de l'autre là où il mourut en
Carthage; que maint grant deuil en furent en cest monde, et maintes grans joies en sont en paradis, de ceus qui en ces deus pelerinaiges moururent en vrai
croisié.
Il fu coronez le premier dymanche des Advens. Li commencemens de celi dymanche de la messe si est,
Ad te levavi animam meam, et ce qui s'en suit après; et dit ainsi:
«Biaus Sire Dieu, je leveray m'ame à toy, je me fi en toy.» En Dieu ot mout grant fiance dès s'enfance jusques à la mort; car là où il mouroit, en ses darrenières paroles reclamoit il Dieu et ses dains; et especialement mon
signeur saint Jaque et ma dame sainte Geneviève.