La paix qu'il fist au
roy d'Angleterre fist il contre la volenté de son conseil, liquels li disoit:
«Sire, il nous semble que vous perdés la terre que vous donnez au
roy d'Angleterre, pour ce que il n'i a droit; car
ses pères la perdi par jugement.» Et à respondi li roys que il savoit bien que
li roys d'Angleterre n'i avoit droit; mais il y avoit raison par quoy il li devoit bien donner.
«Car nous avons deus
serours à femmes, et sont nostre enfant cousin germain; par quoy il
affiert bien que paix y soit. Il m'est mout grans honnours en la paix que je faiz au
roy d'Angleterre, pour ce que il est mes hom, ce que il n'estoit pas devant.»
La leauté dou
roy puet l'on veoir au fait de
mon signeur Renaut de Trie, qui apporta au
saint unes lettres, lesquels disoient que
li roys avoit donné aus
hoirs
la comtesse de Bouloingne, qui morte estoit novellement, la comté de
Danmartin en Gouele. Li seaus de la lettre estoit brisiés, si que il n'i avoit de
remenant fors que la moitié des jambes de l'ymaige dou seel
li roy, et l'
eschamel sur quoy
li roys tenoit ses piez. Et il le nous moustra à tous qui estions de son conseil, et que nous li aidissiens à conseillier.
Nous deismes trestuit, sanz nul descort, que il n'estoit de riens tenus à la lettre mettre à exécution. Et lors il dist à
Jehan Sarrazin, son chamberlain, que il li
baillast la lettre que il li avoit commandée. Quant il tint la lettre, il nous dist:
«Signour, veez ci le seel de quoy je usoie avant que je alasse outre mer, et voit on cler par ce seel que l'empreinte dou seel brisié est semblable au seel entier; par quoy je n'oseroie en bone conscience
ladite comté retenir.» Et lors il appela
mon signour Renaut de Trie et li dist:
« Je vous rent
la comté.»