Je le revi une autre foiz à
Paris, là où tuit li prélat de France le mandèrent, que il vouloient parler à li; et
li roys ala ou palaiz pour eus oïr. Et là estoit
li évesques Guis d'Ausserre, qui fu fiz
mon signour Guillaume de Mello; et dist au
roy pour touz les prelaz en tel manière:
«Sire, cist signour qui sont, archevesque, évesque, m'ont dit que je vous deisse que la crestientés, qui deust estre gardée par vous, se périt entre vos mains.»
Li roys se seigna quant il oï la parole, et dist:
«Or me dites comment ce est. —
Sire, fist il,
c'est pour ce que on prise si peu les excommeniemens
hui el jour, que avant se laissent les gens morir excommeniés que il se facent absoudre, et ne veulent faire satisfaction à l'Esglise. Si vous requièrent,
Sire, pour Dieu et pour ce que faire le devez, que vous commandez à vos prevoz et à vos baillis que touz ceus qui se soufferront escommeniez an et jour, que on les contreingne par la prise de leur biens à ce que il se facent absoudre.» À ce respondi
li roys que il lour commanderoit volentiers de touz ceus dont on le feroit certein que il eussent tort. Et
li évesques dist que il ne le feroient
à nul fuer. Et
li roys li dist que il ne le feroit autrement; car ce seroit contre Dieu et contre raison, se il contreignoit la gens à eus faire absoudre quant li clerc leur feroient tort.
«Et de ce, fist
li roys, vous en doing je un exemple dou
comte de Bretaigne, qui a plaidié sept anz aus prelaz de Bretaigne touz escommeniez, et tant a esploitié que li
apostoles les a condempnez touz. Dont se je eusse contraint
le comte de Bretaigne, la première année, de li faire absoudre, je me fusse meffaiz envers Dieu et vers li.» Et lors se soufrirent li prelat; ne
onques puis nen oy parler que demande fust faite des choses desus dites.