Li sainz roys me conta que plusours gens des Albigeois vindrent au
comte de Montfort qui lors gardoit la terre des Albijois pour
le roy, et li distrent que il venist veoir le cors Nostre Signeur, qui estoit devenuz en sanc et en chair entre les mains au prestre. Et il leur dist:
«Alez le veoir, vous qui ne le créez; car je le croi fermement, aussi comme sainte Esglise nous raconte le sacrement de l'autel. Et savez-vous que je y gaignerai, fist
li cuens, de ce que je le croy en ceste mortel vie aussi comme sainte Esglise le nous enseigne? Je en averai une couronne es cieus plus que les anges, qui le veoient face à face; par quoy il convient que il le croient.»
Il me conta que il ot une grant
desputaison de clers et de Juis ou moustier de
Cluny. Là ot un chevalier à qui
li abbés avoit donné le pain
leens pour Dieu; et requist à
l'abbé que il li lessast dire la première parole, et on li otria à peinne. Et lors il se leva et s'apuia sur sa croce, et dist que on li feist venir le plus grant clerc et le plus grant maistre des Juifs; et si firent il. Et li fist une demande qui fu tele:
«Maistre, fist li chevaliers,
je vous demant se vous créez que la Vierge Marie, qui Dieu porta en ses flans et en ses bras, enfantast vierge, et que elle soit mère de Dieu.» Et li Juis respondi que de tout ce ne créoit il riens. Et li chevaliers li respondi que mout avoit fait que fous, quant il ne la créoit ne ne l'amoit, et estoit entréz en son moustier et en sa maison.
«Et vraiement, fist li chevaliers,
vous le comparrez.» Et lors il hauça sa potence, et
feri le Juif lès l'oye, et le porta par terre. Et li Juif tournèrent en fuie, et emportèrent lour maistre tout blecié; et ainsi demoura la
desputaison.
Lors vint
li abbés au chevalier, et li dist que il avoit fait grant folie. Et li chevaliers dist que encore avoit il fait
greingnour folie d'assembler tel
desputaison; car avant que la
desputaison fust menée à fin, avoit il céans grant foison de bons crestiens, qui s'en fussent parti tuit mescréant, par ce que il n'eussent mie bien entendu les Juis.
«Aussi vous di-je, fist
li roys, que nulz, se il n'est très-bons clers, ne doit desputer à eus; mais li hom lays, quant il ot mesdire de la loy crestienne, ne doit pas desfendre la loy crestienne, ne mais de l'espée, de quoy il doit donner parmi le ventre dedens, tant comme elle y puet entrer.»