Il me dist que
li évesques Guillaume de
Paris li avoit conté que uns grans maistres de divinité estoit venus à li, et li avoit dit que il voloit parler à li. Et il li dist:
«Maistre, dites vostre volenté.» Et quant li maistre
cuidoit parler à
l'évesque, si commença à plorer trop fort. Et
li évesques li dist:
«Maistre, dites, ne vous desconfortés pas; car nulz ne puet tant pechier que Dieus ne puet plus pardonner. — Et je vous di,
sire, dit li maistres,
je n'en puis mais se je pleur; car je
cuit estre mescréans, pour ce que je ne suis mon cuer ahurter à ce que je croie au sacrement de l'autel, ainsi comme sainte Esglise l'enseigne; et si sai bien que ce est des temptacions l'ennemi. — Maistre, fist
li évesques, or me dites, quant li ennemis vous envoie ceste temptacion, se elle vous plait.» Et li maistres dist:
«Sire, mais m'ennuie tant comme il me puet ennuier. — Or vous demant je, fist
li évesques, se vous prendriés ne or ne argent par quoy vous regeissiez de vostre bouche nulle riens qui fust contre le sacrement de l'autel, ne contre les autres sains sacremens de l'Esglise. — Je,
sire, fist li maistres,
sachiez que il n'est nulle riens ou monde que j'en preisse;
ainçois ameroie mieus que on m'arachast touz les membres dou cors, que je le regeisse.»
«— Or vous dirai je autre chose, fist
li évesques. Vous savez que
li roys de France guerroie au
roy d'Engleterre; et savez que li chastiaus qui est plus en la
marche de eus deus, c'est
la Rochelle en Poitou. Or vous veuil faire une demande: que se
li roys vous avoit
baillié
la Rochelle à garder, qui est en la male
marche, et il m'eust
baillié le chastel de
Montlehery à garder, qui est au cuer de France et en terre de paix, auquel
li roys devroit savoir meillour gré en la fin de la guerre, ou à vous qui averiés gardée
la Rochelle sanz perdre, ou à moy qui li averoie gardé le chastel de
Montlehery sans perdre? — En nom Dieu,
sire, fist li maistres,
à moy qui li averoie gardée
la Rochelle sanz perdre. — Maistre, dist
li évesques, je vous di que mes cuers est semblables au chastel de
Montleheri; car nulle temptacion ne nulle doute je n'ai dou sacrement de l'autel. Pour laquel chose je vous di que pour un gré que Dieus me sait de ce que je le croy fermement et en paix vous en sait Dieus quatre, pour ce que vous li gardez vostre cuer en la guerre de tribulacion, et avez si bonne volenté envers li que pour nulle riens terrienne, ne pour
meschief que on feist dou cors, ne le
relenquiriés. Dont je vous di que soiés touz aaises; que vostre estat plait mieus à Nostre Signeur en ce cas, que ne fait li miens.» Quant li maistre oy ce, il s'agenouilla devant
l'évesque, et se tint bien pour paié.