Ci-après orrez un enseignement que il me fist en la mer, quant nous revenions d'outre mer. Il avint que nostre nef hurta devant l'ille de Cypre, par un vent qui a non guerbin, qui n'est mie des quatre maistres venz. Et de ce coup que nostre nef prist, furent li
notonnier si despéré que il dessiroient lour robes et lour barbes.
Li roys sailli de son lit touz
deschaus (car nuis estoit), une
cote, sanz plus, vestue, et se ala mettre en croiz devant le cors Nostre-Signeur, comme cil qui n'atendoit que la mort. L'endemain que ce nous fu avenu, m'apela
li rois tout seul, et me dist:
«Seneschaus, ore nous a moustré Dieus une partie de son grant povoir; car uns de ces petiz venz, qui est si petiz que à peinne le sait-on nommer, dut avoir
le roy de France, ses enfans et sa femme et ses gens noiés. Or diz sainz Anciaumes que ce sont des menaces Nostre Signeur, aussi comme se Dieus
vousist dire: Or vous eussé-je bien mors, se je
vousisse. Sire Dieus, fait li sains, pourquoy nous menaces-tu? Car ès menaces que tu nous faiz, ce n'est pour ton
preu ne pour ton avantage: car se tu nous avoies touz perdus, si ne seroies tu jà plus povres; ne se tu nous avoies tous gaignez, tu n'en serois jà plus riches. Donc n'est ce
pas pour ton
preu la menace que tu nous as faite, mais pour nostre profit, se nous le savons mettre à œuvre. À œuvre devons-nous mettre ceste menace que Dieus nous a faite, en tel manière que, se nous sentons que nous aions en nos cors chose qui desplaise à Dieu, oster le devons hastivement; et quanque nous
cuiderons qui li plaise, nous nous devons esforcier hastivement dou prendre. Et se nous le faisons ainsinc, Nostre-Sires nous donra plus de biens en cest
siecle et en l'autre que nous ne saurions devisier. Et se nous ne le faisons ainsi, il fera aussi comme li bons sires doit faire à son mauvais serjant; car après la menace, quant li mauvais serjant ne se veut amender, li sires le
fiert ou de mort ou de autres
greingnours
mescheances, qui piz valent que mort.»
Si y preigne garde
li roys qui ore est; car il est eschapez de aussi grant peril ou de plus que nous ne feimes: si s'amende de ses mesfais en tel manière que Dieu ne
fiere en li ne ses choses cruelment.