Il ama tant toutes manières de gens qui Dieu créoient et amoient, que il donna la connestablie de France à mon signour
Gille le Brun (qui n'estoit pas dou royaume de France), pour ce qu'il estoit de grant renommée de croire Dieu et amer. Et je croy vraiment que tels fu il.
Maistre Robert de Sorbon, pour la grant renommée que il avoit d'estre preudome, il le faisoit mangier à sa table. Un jour advint que il manjoit
delez moy, et devisions li uns à l'autre. Et nous reprist et dist
«Parlés haut, fist-il,
car vostre compaignon
cuident que vous mesdisiés d'eus. Se vous parlés, au mangier, de chose qui nous doie plaire, si dites haut; ou se ce non, si vous taisiés.»
Quant
li roys estoit en joie, si me disoit:
«Seneschaus, or me dites les raisons pour quoy preudom vaut mieus que beguins.» Lors si encommençoit la
tençons de moy et de
maistre Robert. Quant nous avions grant piesce desputé, si rendoit sa sentence et disoit ainsi:
«Maistre Roberz, je vourroie bien avoir le nom de preudome, mais que je le fusse, et touz li
remenans vous demourast; car preudom est si grans chose et si bone chose que
neis au nommer, emplist-il la bouche.» Au contraire disoit il que male chose estoit de prendre de l'autrui;
«car li rendres estoit si grief que,
neis au nommer, li rendres escorchoit la gorge par les erres qui y sont, lesquels senefient les ratiaus au diable, qui touz jours tire arière vers ceus qui l'autrui
chatel veulent rendre. Et si
soutilment le fait li dyable; car aus grans usuriers et aus granz
robeours, les
attice il si que il lour fait donner pour Dieu ce que il devroient rendre.»
Il me dist que je deisse au
roi Tibaut de par li, que il se preist garde à la maison des Preescheours de Provins, que il faisoit, que il n'encombrast l'ame de li pour les granz deniers que il y metoit.
«Car li saige home, tandis que il vivent, doivent faire dou lour aussi comme executour en devroient faire; c'est à savoir que li bon executour desfont premièrement les torfaiz au mort, et rendent l'autrui
chatel; et dou
remenant de l'avoir au mort font aumosnes.»