Il m'apela une foiz et me dit:
«Je n'os parler à vous (pour le
soutil senz dont vous estes) de chose qui touche à Dieu; et pour ce ai je appelé ces deus frères qui ci sont, que je vous vueil faire une demande.» La demande fu tele:
«Seneschaus, fist-il,
quele chose est Dieus?» Et je li diz:
«Sire, ce est si bone chose que mieudre ne puet estre. — Vraiment, fist il,
c'est bien respondu; que ceste response que vous avez faite est escripte en cest livre que je tieng en ma main. Or vous demant je, fist il,
lequel vous ameriés mieus, ou que vous fussiés
mesiaus, ou que vous eussiés fait un pechié mortel?» Et je, qui
onques ne li menti, li respondi que je en ameroie mieus avoir fait trente que estre
mesiaus. Et quant li frere s'en furent parti, il m'appela tout seul, et me fist seoir à ses piez et me dist:
«Comment me deistes-vous hier ce?» Et je li diz que encore li disoie-je. Et il me dist:
«Vous deistes comme hastif
musarz; car vous devez savoir que nulle si laide
mezelerie n'est comme d'estre en pechié mortel, pour ce que l'ame qui est en pechié mortel est semblable au dyable: par quoy nulle si laide
meselerie ne puet estre. Et bien est
voirs que quant li hom meurt, il est guéris de la
meselerie du cors; mais quant li hom qui a fait le pechié mortel meurt, il ne sait pas ne n'est certeins que il ait eu en sa vie tel repentance que Dieus li ait perdonné: par quoy grant poour doit avoir que celle
mezelerie li dure tant comme Dieu iert en paradis. Si vous pri, fist il,
tant comme je puis, que vous metés votre cuer à ce, pour l'amour de Dieu et de moy, que vous amissiez mieus que touz
meschief avenist au cors, de
mezelerie et de toute maladie, que ce que li pechiés mortels venist à l'ame de vous.»
Il me demanda se je lavoie les piez aus povres le jour dou grant jeudi:
«Sire, dis-je en maleur!
les piez de ces vilains ne laverai-je jà. — Vraiment, fist il,
ce fu mal dit; car vous ne devez mie avoir en desdaing ce que Dieu fist pour nostre enseignement. Si vous pri je, pour l'amour de Dieu premier, et pour l'amour de moy, que vous les acoustumez à laver.»