Li premiers faiz où il mist son cors en avanture de mort, ce fu à l'ariver que nous feimes devant
Damiete, là où touz ses conseils li loa, ainsi comme je l'entendi, que il demourast en sa nef, tant que il veist que sa chevalerie feroit, qui aloit à terre.
La raison pour quoy on li loa ces choses si estoit tels que, se il arivoit avec eus, et sa gent estoient occis et il avec, la besoigne seroit perdue; et se il demouroit en sa nef, par son cors peust-il recouvrer à reconquerre la terre de Egypte. Et il ne vout nullui croire,
ains sailli en la mer, touz armez, l'escu au col, le glaive ou poing, et fu des premiers à terre.
La seconde foiz qu'il mist son cors en avanture de mort, si fu tels, que au partir qu'il fist de
la Massourre pour venir à
Damiete, ses conseils li loa, si comme l'on me donna à entendre, que il s'en venist à
Damiete en
galies. Et cis conseils li fu donnez, si comme l'on dit, pour ce que, se il li
meschéoit de sa gent, par son cors les peust delivrer de
prison.
Et especialment cis conseils li fu donnez pour le
meschief de son cors où il estoit par plusours maladies qui estoient tels, car il avoit double tercienne et
menoison mout fort, et la maladie de l'
ost en la bouche et es jambes. Il ne vout
onques nullui croire;
ainçois dist que son peuple ne lairoit-il jà, mais feroit tel fin comme il feroient. Si li en avint ainsi, que par la
menoison qu'il avoit, que il li couvint le soir couper le font de ses braies, et par la force de la maladie de l'
ost se
pasma-il le soir par plusours foiz, aussi comme vous orrez ci-après.
La tierce foiz qu'il mist son cors en avanture de mort, ce fu quant il demoura quatre ans en la sainte Terre, après ce que sui frere en furent venu. En grant avanture de mort fumes lors; car quant
li rois fu demourez en
Acre, pour un home à armes que il avoit en sa compaignie, cil d'
Acre en avoient bien trente, quant la ville fu prise.
Car je ne sai autre raison pour quoy li Turc ne nous vindrent
penre en la ville, fors que pour l'amour que Dieus avoit au
roy, qui la poour metoit ou cuer à nos ennemis, pour quoy il ne nous osassent venir courre sus. Et de ce est escrit:
«Se tu creins Dieu, si te creindront toutes les riens qui te verront.» Et ceste demourée fist-il tout contre son consoil, si comme vous orrez ci-après. Son cors mist-il en avanture pour le peuple de la terre garantir, qui eust esté perdus dès lors se il ne se fust lors
remez.
Li quarz faiz là où il mist son cors en avanture de mort, ce fu quant nous revenismes d'outremer et venismes devant l'ille de Cypre, là où nostre nez hurta si malement que la terre là où elle hurta, enporta trois toises dou tyson sur quoy nostre nez estoit fondée.
Après ce,
li roys envoia
querre quatorze maistres
notonniers, que de celle nef que d'autres qui estoient en sa compaignie, pour li conseillier que il feroit. Et tuit li loerent, si comme vous orrez ci-après, que il entrast en une autre nef; car il ne véoient pas comment la nez peust soufrir les cos des ondes, pour ce que li clou de quoy les planches de la nef estoient atachies estoient tuit eslochié. Et moustrerent au
roy l'exemplaire dou peril de la nef, pour ce que à l'aler que nous feismes outre mer, une nez en semblable fait avoit estei perie; et je vi la femme et l'enfant chiez
le comte de Joigny, qui seul de ceste nef eschaperent.
À ce respondi
li roys: «Signour, je voi que se je descent de ceste nef, que elle sera de refus; et voy que il a céans huit cens personnes ou plus; et pour ce que chascuns aime autretant sa vie comme je faiz la moie, n'oseroit nulz demourer en ceste nef,
ainçois demourroient en Cypre. Par quoy, se Dieu plait, je ne metterai jà tant de gens comme il a céans en peril de mort;
ainçois demourrai céans pour mon peuple sauver.»
Et demoura; et Dieus, à cui il s'atendoit, nous sauva en peril de mer bien dix semainnes; et venimes à bon port, si comme vous orrez ci-après. Or avint ainsi que
Oliviers de Termes, qui bien et viguerousement s'estoit maintenus outre mer, lessa
le roy et demoura en Cypre, lequel nous ne veismes puis d'un an et demi après. Ainsi destourna
li roys le doumaige de huit cens persones qui estoient en la nef.
En la darenière partie de cest livre parlerons de sa fin, comment il trespassa saintement.
Or di-je à vous,
monsignour le roy de Navarre, que je promis à
ma dame la royne vostre mère (à cui Dieu bone
merci face!), que je feroie cest livre; et pour moy
aquitier de ma promesse, l'ai-je fait. Et pour ce que je ne voi nullui qui si bien le doie avoir comme vous qui estes ses
hoirs, le vous envoi-je, pour ce que vous et vostre frère, et li autre qui l'orront, y puissent prendre bon exemple, et les exemples mettre à œuvre, par quoy Dieus lour en sache gré.