ay beaucoup mis, avant que retourner à mon propos de l'arrest en quoy estimoit
le roy estre à
Péronne, dont
j'ay parlé ci-devant, et en suis sailly, pour dire aux princes mon advis de telles assemblées. Ces portes ainsi fermées et les gardes qui y estoient commis, furent ainsi deux ou trois jours; et cependant
ledit duc de Bourgongne ne vit point
le roy, ni n'entroit des gens du
roy au
chasteau, que peu, et par le guichet de la porte. Nuls des gens dudit
seigneur ne furent ostés d'auprès de luy, mais peu ou nuls de ceux du
duc alloient parler à luy, ni en la chambre, au moins de ceux qui avoient auctorité avec luy. Le premier jour ce fut tout effroy et murmure par
la ville. Le second jour
ledit duc fut un peu refroidy. Il tint conseil la pluspart du jour et partie de la nuict.
Le roy faisoit parler à tous ceux qu'il pouvoit penser qui luy pourroient ayder, et ne failloit pas à promettre, et ordonna distribuer quinze mil escus d'or; mais celuy qui en eut la charge en retint une partie, et s'en acquitta mal, comme
le roy sçut depuis.
Le roy craignoit fort ceux qui autresfois l'avoient servi, lesquels estoient venus avec cette armée de Bourgongne, dont
j'ay parlé, qui jà se disoient au
duc de Normandie son frère. A ce conseil, dont
j'ay parlé, y eut plusieurs oppinions: la pluspart louèrent et furent d'avis que la sûreté qu'avoit
le roy luy fust gardée, vu qu'il accordoit assez la paix en la forme qu'elle avoit été couchée par escript. Autres vouloient sa prise rudement, sans cérémonie.
Aucuns autres disoient qu'à la diligence on fist venir
monseigneur de Normandie son frère, et qu'on fist une paix bien avantageuse pour tous les princes de France. Et sembloit bien à ceux qui faisoient cette ouverture, que si elle
s'accordoit,
le roy seroit restrainct; et qu'on luy
bailleroit gardes; et qu'un si grand seigneur prins ne se délivre jamais ou à peine, quand on luy a fait une si grande offence. Et en vy les choses si près, que
je vy un homme
housé et prest à partir, qui jà avoit plusieurs lettres adressantes à
monseigneur de Normandie estant en Bretagne, et n'attendoit que les lettres du
duc; toutesfois cecy fut rompu.
Le roy fit faire des ouvertures, et offrir de
bailler en ostage
ledit duc de Bourbon, et
le cardinal son frère,
le connestable, et plusieurs autres, et qu'après la paix conclue, il pust retourner jusques à
Compiègne; et qu'incontinent il feroit que les Liégeois répareroient tout, ou se déclareroit contr'eux. Ceux que
le roy nommoit pour estre ostages s'offrirent fort, au moins en public.
Je ne sçay s'ils disoient ainsi à part,
je me doute que non, et à la vérité
je croy, qu'il les y eust laissés, et qu'il ne fust pas revenu.
Cette nuict, qui fut la tierce,
ledit duc ne se dépouilla
oncques. Seulement se coucha par deux ou trois fois sur son lict, et puis se pourmenoit; car telle estoit sa façon, quand il estoit troublé.
Je couchay cette nuict en sa chambre, et me pourmenay avec luy par plusieurs fois. Sur le matin se trouva en plus grande colère que jamais, en usant de manaces, et prest à exécuter grande chose; toutesfois il se réduisit en sorte que, si
le roy juroit la paix et vouloit aller avec luy à
Liége, pour luy ayder à se venger, et
monseigneur de Liége, qui estoit son proche parent, il se contenteroit; et soudainement partit pour aller en la chambre du
roy, et luy porter ces paroles.
Le roy eut quelque amy qui l'en advertit, l'assurant de n'avoir nul mal, s'il
accordoit ces deux poincts; mais s'il faisoit le contraire, il se mettroit en si grand péril, que nul plus grand ne luy pourroit advenir.
Comme
le duc arriva en sa présence, la voix luy trembloit, tant il estoit esmu, et prest de se courroucer. Il fit humble contenance de corps; mais sa geste et parole estoit aspre, demandant au
roy s'il ne vouloit pas tenir le traicté de paix, qui avoit esté escript et
accordé, et si ainsi le vouloit jurer; et
le roy lui respondit qu'ouy. A la vérité il n'y avoit rien esté renouvelé de ce qui avoit esté fait devant
Paris, touchant
le duc de Bourgongne, ou peu du moins, et touchant
le duc de Normandie, luy estoit beaucoup amandé; car il estoit dit qu'il renonceroit à la duché de Normandie, et auroit Champagne et Brie, et autres places voisines, pour son partage. Après luy demanda
ledit duc s'il ne vouloit point venir avec luy à
Liége, pour ayder à revancher la trahison que les Liégeois luy avoient faite, à cause de luy et de sa venue; et aussi luy dist la prochaineté du lignage, qui estoit entre
le roy et
l'évesque de Liége; car il estoit de la maison de Bourbon. A cette parole
le roy respondit qu'après que la paix seroit jurée (ce qu'il désiroit fort), il seroit content d'aller avec luy à
Liége, et d'y mener des gens, en si petit ou si grand nombre que bon luy sembleroit. Ces paroles éjouirent fort
le duc; et incontinent fut apporté ledit traicté de paix, et fut tirée des coffres du
roy la vraye croix, que
saint Charlemagne portoit, qui s'appelle la croix de Victoire; et jurèrent la paix; et tantost furent sonnées les cloches par
la ville, et tout le monde fut fort éjouy. Autresfois a plu au
roy
me faire cet honneur de dire, que
j'avoye bien servy à cette pacification. Incontinent escrivit
ledit duc en Bretagne ces nouvelles, et envoya le double du traicté, par lequel ne se déjoignoit, ni se délioit d'eux; et si avoit
ledit monseigneur Charles partage bon, vu le traicté qu'ils avoient fait peu avant en Bretagne, par lequel ne luy demouroit qu'une pension, comme avez ouÿ.